Bilatzaile berri honek CoverFlow izeneko aurkezpena erabiltzen du bilaketaren emaitzak azaltzeko, nahiz eta ohiko bilatzaileen ikuspegia ere ikusteko aukera ematen duen. Dakizuen bezala, CoverFlow Apple-ek Mac-en Finder eta Itunes-en, besteak beste, erabiltzen duen aurkezpen mota bat da. Izan ere, Apple-ek 2006an eskubideak erosi zituen bere aplikazioetan jartzeko. Hori zer den ez dakienarentzat, Mootools Javascript erabiliz, antzeko zerbait egin daiteke eta hona hemen adibidea.

Dena den, eta egin ditudan frogen arabera, bilatzaile honek duen edertasunak ez du gainditzen beste bilatzaileek eskaintzen dituzten emaitzak. Eta bilatzaile batera jotzen dugunean, ez goaz edertasunaren bila, baizik eta emaitza onen bila. Alegia, bilatu nahi dugun informazioa ahalik eta azkarren lortu nahi dugu, eta ez dugu emaitzen artean denbora galtzen ibili nahi.

Egin ditudan frogetan ohartu naiz Web 2.0ko zerbitzu batzuen emaitzak oso ongi azaltzen dituela; adibidez, “Ordizia” bilatu dudanean, Ordiziako Udalaren webgunea ez da inon azaltzen, bai ordea gure ikastolako blogak, Flickr-en ditugun argazkiak, Odeo-ko podcast-ak, Slideshare-ko aurkezpenak… Hau da, zerbitzu horietan “Ordizia” etiketarekin gordetako elementuak oso ongi azaltzen dituen bitartean, ez du gauza bera egiten ohiko webguneekin ezta, zerbitzu guztiekin ere; adibidez, “Ordizia mapa” bilaketa egiterakoan ez dira inondik ere azaltzen “Ordizia” etiketarekin gordeta ditugun Tagzaniako mapak, Google Maps-ekoak… Beno, bai, blogetan txertatu ditugun mapak bai agertzen dira, baina ez zuzenean zerbitzu horietan gordetako mapak. Ordizia, oso txikia izanik, normaltzat jo dezakegu ez azaltzea, orduan, New York-ekin ariketa bera egitea pentsatu dut. Emaitzak ikusita ohartu naiz gauza bera gertatzen zela. Gutxienez, horretan, Ordizia New Yorken pare dago.

Laburbilduz, bilatzaile oso erakargarria, baina ikaragarrizko lana duena besteek eskaintzen dituzten emaitzen mailara iristeko. Nik garbi daukat Elebila, Google, del.icio.us … erabiltzen jarraituko dudala.

Oooops!!! Oporretan gaude eta gauzak erdizka egiten hasita gaude. Ahaztu egin zait esatea bilatzaile hau frogatu nahi duenak euren webgunera joan eta e-posta bidali beharko diela beta fase horretan parte hartu ahal izateko. Gero, beraiek gonbitea noiz bidaliko zain gelditu beharko du. Zorte on!!

Google Sky, orain arte Google Earth-en erabili zitekeena, jadanik, web nabigatzaileetik kontsultatu daiteke gazteleraz eta beste hizkuntzetako edukiarekin.

Zerbitzu honetan, irudi historikoez gainera, datu edo irudi kapa desberdinen artean hautatu dezakezu; zeruko zona batzuetan, infragorri edo mikrouhinekin lortutako irudiak aktibatu ditzazkezu.

Espaziotik edo Lurretik, ibilaldi bat eman nahi baduzue, zerbitzu hauek erabiltzera animatzen zaituztet.

Garbi dago Wordpress-en inguruan lanean dabilen jendea lan ikaragarria egiten ari direla CMS hau geroz eta ahaltsuagoa bihurtzen dutelarik. Orain arte pluginak erabiliz egin behar izaten genituen gauzak, poliki-poliki ezartzen ari dira (etiketak, multimedia, editorea…), baina oraindik ez dut ulertzen nola arraio ez dituzte beste inplementazio batzuk burutzen, batez ere lokalizazio eta internalizazioaren inguruan. Wordpress komunitateak lokalizazio lan handia egin du eta edozein hizkuntza topa dezakegu Wordpress, baina gune eleanitza edo elebiduna ekoiztu nahi duenak pluginekin “borrokan” hasi behar du eta informatika kontuetan oso aditua ez bada (horixe da nire kasua), erotuta ibiltzeko arrisku bizia du.

Globalizatutako mundu honetan, geroz eta gehiago dira sortzen ari diren gune eleanitzak eta behar hori geroz eta nabarmenagoa da. Euskaldunon kasuan, gune asko hizkuntza ezberdinetan garatu behar izaten ditugu (Euskara-Gaztelera edo Euskara-Frantsesa oso ohiko konbinazioak dira gurean). Horregatik, itxaropentsu nengoen bertsio berri honekin eta gai horren inguruan zer edo zer egingo zutela konbentzituta nengoen, batez ere Lorelle-k mezu hau idatzi zuenean. Dena den, bertsio berri honetan, ez dut ezertxo ere topatu eta nire dezepzioa handi xamarra izan da. Izan ere, webgune elebidun bat (euskara-gaztelera) martxan jarri nahi dugu eta frogatu ditugun pluginekin ez dugu asmatzen eta beti atal dezente hizkuntz bakar batean gelditzen zaizkigu.

Wordpress-ek aukera hori inplementatzen duen arte itxaroterik ez dugunez, lehenbailehen irtenbide bat topatu beharrean gaude. Ziur gaude zuetako askok jakingo duzuela nola arraio konpon dezakegun arazo hori eta zuen laguntza estimatua izango da. Orain arte, Joomla, Drupal eta Wordpress izan dira frogatu ditugun CMSak, baina oraindik ez dugu topatu gure beharrak asetuko dituen irtenbiderik. Zuen laguntzaren zain.

Programa jaitsi, instalatu eta ordenagailua berrabiarazi ondoren, frogatu nahi izan dut. Egia esan ez diot denbora gehiegirik eskaini. Izan ere, hainbat orriekin arazotxoak ikusten nituen eta ez nenbilen oso gustura. Google Reader ez nuen ongi ikusten, gure blog hau ere ez nuen ongi ikusten eta bertan idazten hasi naizenean, arazo mordo bat izan ditut eta moztea erabaki dut.

Nolanahi ere, gauzak ongi egiten saiatu badira, aukera bat eman beharko diogu eta Beta fase hau igaro ondoren egin beharko diogu benetako balorazioa.

Probatu nahi baduzue, helbide honetan jaisteko dauden aukera ezberdinak ikusiko dituzue. Zuen lehen inpresioaren zain gelditzen gara.

Ez dut probatu oraindik, albiste hau bukatu bezain pronto jarriko naiz lanean, baina lehen itxura oso ona da. Techcrunchen irakurri dudan albistearen amaieran zera dio:

In an interview today, Google’s Management Director of Enterprise Matthew Glotzbach called the combined products under Google Apps a “Microsoft Sharepoint killer” because it’s allowing businesses to collaborate without all that expensive Microsoft software

Agian gehiegizkoa da horrelako zerbait adieraztea. Seguru nago enpresa mailan pakete hau baino potente eta sendoagoak diren aplikazioa asko erabiliko direla. Seguruenik Sharepoint asko egongo dira hortikan zehar; baina aplikazio hauen balorea ez dago euren prezioa baizik eta egiten den erabileran. Nire ikastolan duela dezentetik hasiak gara elkarlana bultzatzen, talde bezala funtzionatzen edukien sorreran, komunikazio mailan… Jarrera honi etekin handiagoa ateratzeko tresna garrantzitsua izango da Google Apps berri hau, dudarik gabe. Askotan esan dudan bezala, tresnak baino gehiago zerbitzuak, teknologia baino gehiago giza-harremanak dira eguneroko lanari ateratzen diogun etekina ahalik eta hobena izateko. Ziurrenik aplikazio bezala ez da punta puntakoa izango, baina ikastolan dagoeneko zabaltzen ari den lan filosofiari izugarrizko bultzada emango diola ziur nago.

Aplikazioak merezi duen arreta eta denbora eskaini ondoren, hona ekarriko ditut zeintzuk izan diren nire lehen inpresioak. Laister arte beraz.